У вёсцы адбылося штогадовае свята – Дзень вёскі, якое аб’ядноўвае жыхароў і захоўвае традыцыі сяла.
23 июля, "Кобринский вестник"/ Па гістарычных дадзеных, першая згадка пра Навасёлкі датуецца 1502 годам, а па летапісе – 1567.
Звычай ушанавання жыхароў у розных сферах жыцця не абмінуў і ў гэтым годзе: Міхаіл Клімук быў адзначаны як гаспадар лепшага дома і двара, а залатыя юбіляры – Пётр і Яўгенія Пракапюк – адзначылі 50 гадоў сумеснага жыцця. Асаблівую павагу выклікала Вера Улезла, ветэран вайны і старэйшы насельнік вёскі, якой споўнілася 95 гадоў.
У гэты дзень прывіталі і самую юную жыхарку – аднагадовую Кацярыну Мартынюк – прадстаўніцу новага пакалення навасёлкаўцаў. Адмысловую ўвагу надалі і школьнікам – сёлета ў Навасёлкаўскай школе тры першакласніка: Ягор і дзве Соф’і. Таксама ўзгадалі хлопцаў, якія зараз служаць у арміі, выказваючы падзяку за іх службу.
Свята прайшло з вялікай канцэртнай праграмай: выступалі прадстаўнікі калектыва самадзейнасці Навасёлкаўскага Дома культуры, а таксама запрошаныя артысты з Верхалескага ДК.
Для гасцей была арганізавана выстава народных промыслаў і бяспройгрышная латарэя, якую падрыхтавала мясцовая гаспадарка. З віншавальнымі словамі выступілі старшыня Навасёлкаўскага сельсавета Валянцін Скакун і дырэктар ААТ «Навасёлкаўскі» Васіль Яшчук.
Дзень вёскі Навасёлкі традыцыйна прымеркаваны да царкоўна-прыходскага свята – Дня прападобнага Ануфрыя Вялікага, які адзначаецца 25 чэрвеня. Свята праводзіцца штогод, чаргуючыся з Днём вёскі ў суседнім Бельску, які сёлета пройдзе 2 жніўня.
Ірына АМЕЛЬЯНЧУК
Фота з архіва Навасёлкаўскага ДК
Поделиться в соцсетях:
