Харчовы рэзерв: гарачы час нарыхтовак

З мая-чэрвеня і да канца кастрычніка ідзе сезон нарыхтовак у раённым спажывецкім таварыстве. Аб тым, якую прадукцыю тут прымаюць і па якой цане, якія пры гэтым неабходны дакументы і куды яна потым накіроўваецца, наш карэспандэнт пацікавіўся ў начальніка аддзела нарыхтовак арганізацыі Галіны Фіцук.

- Пералік відаў прадукцыі, якую закупляе ў насельніцтва раённае спажывецкае таварыства, даволі вялікі. Прымаем агуркі па 1200 рублёў за кілаграм, таматы – 3000 рублёў, бульбу – 1200 рублёў, часнок – 15000 рублёў, цыбулю – 2500 рублёў, моркву – 1800 рублёў, буракі – па 1500 рублёў. У сувязі з тым, што сёлета даволі вялікія аб’ёмы капусты – закупачная цана на яе складае 400 рублёў за кілаграм. Таксама пачалі закупку грыбоў лісічак – па 6000 рублёў і яблык (апад) – па 500 рублёў за кілаграм. Яблыкі бярэм любыя, галоўная ўмова – каб яны не былі гнілымі.

- Не сакрэт, што ў апошнія гады назіраецца вялікі попыт на чарніцы...

- Нашым таварыствам закуплена 7 тон чарніц, прычым пачыналі закупкі з 10000 рублёў за кілаграм, а заканчвалі ўжо па 21000 рублёў. І хоць аб’ёмы закупак у параўнанні з мінулым годам мы павялічылі ў 2,6 раза, канчатковы вынік нас не вельмі задаволіў. Імкнуліся закупіць 20 тон чарніц, аднак паўплывалі розныя фактары.

- Ці ўзраслі ўвогуле аб’ёмы нарыхтовак у параўнанні з мінулым годам?

- Так. За сем месяцаў намі нарыхтавана сельскагаспадарчай прадукцыі на 2 мільярды 615 тысяч рублёў, што складае 108,4% тэмпу росту ад запланаваных 107%. З агульнага аб’ёму нарыхтовак у насельніцтва было закуплена прадукцыі на 1 мільярд 677 мільёнаў рублёў. Аб эфектыўнасці дзейнасці галіны сведчыць прыбытак за першае паўгоддзе ў 114 мільёнаў рублёў.

- Дарэчы, яшчэ якія ягады закупляе раённае спажывецкае таварыства у насельніцтва? Куды потым ідзе прадукцыя?

- Неўзабаве пачнем прыёмку рабіны чырвонаплоднай і чарнаплоднай: прыблізны кошт на апошнюю – 1500 рублёў за кілаграм. Сезон закупкі чорных парэчак ужо скончыўся – усяго іх нарыхтавана 1 тона 400 кілаграмаў. Уся прадукцыя была накіравана на перапрацоўку на наш Кобрынскі кансервавы завод, куды пастаўляем і іншую агародніну і садавіну. Таксама ў нас заключаны дагаворы на адпраўку прадукцыі з камбінатам “Брэсцкае піва”, Пінскім, Пружанскім і Слонімскім вінаробнымі заводамі – туды адпраўляем у асноўным яблыкі, з Баранавіцкім камбінатам харчовых прадуктаў. Дагаворы на прыём прадукцыі заключаем таксама з насельніцтвам, фермерамі, уласнікамі прысядзібных гаспадарак.

- Якія неабходна мець на руках дакументы пры здачы сельскагаспадарчай прадукцыі?

- Даведку з сельскага выканкама аб наяўнасці прысядзібнага ўчастка. Аднак калі такой даведкі няма ў наяўнасці, мы ўносім прозвішча здатчыка ў агульную ведамасць, якая потым завяраецца ў тым жа сельскім выканкаме. Калі прадукцыя здаецца ў значных аб’ёмах – таксама неабходна мець даведку з лабараторыі рынку.

Падрыхтаваў Ян ПАЛЕСКІ.